बालअधिकार सचेतना समूहद्वारा ध्यानाकर्षण

सप्तरी । २०८० माघ १२ गते

इन्सेकद्वारा गठित डाक्नेश्वरी नगरपालिका–७ स्थित रामेश्वर मेमोरियल माध्यमिक विद्यालयको बाल अधिकार सचेतना समूहले विद्यालय व्यवस्थापन समिति गठनका लागि वडा अध्यक्ष शत्रुघ्न मण्डललाई ०८०माघ १० ध्यानाकर्षण पत्र बुझाएको छ। बिगत ५ वर्षदेखि विद्यालय व्यवस्थापन समिति नभएको कारणले विद्यालयको भौतिक संरचना र शैक्षिक गुणस्तर तथा शैक्षिक व्यवस्था प्रभावित भएको भन्दै सचेतना समूहले अविलम्ब समिति गठनको पहल गर्न वडा अध्यक्ष मण्डलको ध्यानाकर्षण गराएको हो ।

समितिको अभावमा विद्यालयको शैक्षिक व्यवस्थापन र बिद्यार्थीहरुको शिक्षामा प्रत्यक्ष प्रभाव परेको भन्दै ०८० पुस ५ गते बसेको अभिभावक भेलाले व्यवस्थापन समिति गठन गर्न माग गरेको थियो । अभिभावकहरूले इन्सेकसँग आफ्नो बालबालिकाहरूको भविष्यमाथि खेलवाड भइरहेको गुनासो गरेका थिए । ध्यानाकर्षण पत्र बुझ्दै वडा अध्यक्ष मण्डलले विद्यालय व्यवस्थापन समिति गठनको लागि नगरपालिका कार्यालयमा पत्राचार गरेको जानकारी दिनु भयो । उहाँले सबैको सहयोगमा माघ भित्र व्यवस्थापन समिति गठन हुने प्रतिबद्धता जनाउनु भयो । बाल अधिकार सचेतना समूहका अध्यक्ष रुपेश कुमार सन्त, उपाध्यक्ष चाँदनी मण्डल, सदस्य दिनेश कुमार मण्डल र इन्सेक जिल्ला सहजकर्ता अजय परियार लगायतको टोलीले ध्यानाकर्षण पत्र बुझाउनु भएको थियो ।

मनोहरकुमार पोखरेल