मानव अधिकार समूहको कार्ययोजना निर्माण र समस्या पहिचान बैठक सम्पन्न

सप्तरी । २०८१ साउन २२ गते

अनौपचारिक क्षेत्र सेवा केन्द्र (इन्सेक) मधेस प्रदेशद्वारा गठित डाक्नेश्वरी नगरपालिकाको मानव अधिकार समूहले ०८१ साउन २१ गते कार्ययोजना निर्माण र समस्या पहिचान बैठक सम्पन्न गरेको छ ।

विद्यालयहरूको अनुगमन, सरसफाइ कार्यक्रम, वृक्षारोपण, लैङ्गिक हिंसा विरुद्धको अभियान सञ्चालन सम्बन्धमा सर्वसम्मतिले कार्ययोजना निर्माण भएको छ । सबै वडामा मानव अधिकार समूह गठन गर्ने र वडामा देखिएका समस्याहरूलाई समाधान गर्न नगर र सम्बन्धित निकायलाई स्थानीय तहमा ध्यानाकर्षण पत्र बुझाउने भनी निर्णय भएको अध्यक्ष मण्डलले बताउनु भयो ।

     

समूहका अध्यक्ष रामचन्द्र मण्डलले सबै खाले अधिकारबाट वञ्चित नागरिकको समस्या पहिचान गरी न्यायका लागि पहल गर्ने कर्तव्य अनुरुप वडामा देखिएका समस्याहरूको समाधानका लागि स्थानीय तह र प्रदेश सरकारसम्म लैजानु पर्ने समूहको जिम्मेवारी बोध गराउनु भयो ।

समाज परिवर्तन समाजकै मानिसबाट हुने भन्नुहुँदै उपाध्यक्ष अनु देबी चौधरीले न्यायको पहुँचबाट टाढा रहेका हरेक नागरिकलाई न्याय पाउने वातावरण बनाउन अधिकारकर्मीको जिम्मेवारी रहेको बताउनु भयो ।

बैठकको समन्वय गर्दै इन्सेक सहजकर्ता अजय परीयारले इन्सेकको परियोजनाले गर्ने काम र उद्देश्यबारे प्रकाश पार्नु भयो । मानव अधिकार समूहका अध्यक्ष रामचन्द्र मण्डलको अध्यक्षतामा सम्पन्न वैठकमा उपाध्यक्ष चौधरी र सम्पूर्ण सदस्यहरू तथा इन्सेक जिल्ला सहजकर्ता परीयारको सहभागिता रहेको थियो ।

मनोहरकुमार पोखरेल