समाज कल्याण परिषद्का प्रतिनिधिद्वारा कार्यक्रमको अनुगमन तथा मूल्याङ्कन

बाँके । २०७९ चैत २४ गते

समाज कल्याण परिषद्का प्रतिनिधि टोलीले राप्ती सोनारी गाउँपालिकामा  इन्सेकद्वारा सञ्चालित कार्यक्रमको अनुगमन तथा मूल्याङ्कन गरेको छ । समाज कल्याण परिषद्का प्रतिनिधि बलराम देवकोटा र दिपेन्द्र पन्तले चैत २३ गते राप्ती सोनारी गाउँपालिकामा पुगेर इन्सेक अनुगमन गरेको हो । उक्त टोलीले राप्ती सोनारी गाउँपालिका अध्यक्ष तप्तबहादुर पौडेल , मानव अधिकार समूह र इन्सेक  कर्मचारीहरूसँगको  कार्यक्रम सञ्चालन सिकाई र चुनौतीका विषयमा छलफल गरेको थियो । छलफलका क्रममा राप्ती सोनारी गाउँपालिका अध्यक्ष पौडेलले मानव अधिकारको सवालमा इन्सेकले उल्लेखनीय कार्य गरेको भन्दै द्वन्द्व पीडितको पहिचान ,बादी, कुमाल, खुना , अल्पसङ्ख्यक लगायतका पछाडी पारिएका समुदायलाई शिक्षा ,स्वास्थ्य र खाद्य अधिकारको विशेष लक्षित कार्यक्रम साथै पाँचौ राष्ट्रिय मानव अधिकार कार्ययोजना कार्यान्वयन गर्ने बताउनु भयो ।

गाउँपालिका स्तरीय मानव अधिकार समूहका संयोजक धनी वलीले शिक्षा, स्वास्थ्य र खाद्य अधिकारमा विभिन्न अभियान सञ्चालन गरेका बताउदै, कर्मचारी तथा जनप्रतिनिधिहरूको  सहकार्य र समन्वयमा  समूहले गरेको उपलब्धी तथा दिगोपनाका बारे जानकारी गराउनु भयो । यसैगरी, इन्सेक प्रदेश कार्यालयका कर्मचारीहरूसँग पनि टोलीले छलफल गरेको छ । इन्सेक लुम्बिनी प्रदेश संयोजक भोला महतले प्रदेश कार्यालयले पछिल्लो समय सार्बजनिक सरोकारका विषयलाई लिएर कानुन व्यवसायीहरू सँगको समन्वयमा रिट निवेदन दर्ता गर्दै आएको बताउनु भयो ।

लक्ष्मी थारू