HUMAN RIGHTS NEWS PORTAL
जनजिविकाके सवालमे कानून निर्माणमे ढिलाई
पहुरा दैनिक डटकम, धनगढी । २०७८ पुस ८ गते
नागरिक समाजके अगुवाहुक्रे जनजिविकाके सवालमे कानून निर्माणमे ढिलाई हुइटी रहल बटैले बटै । इन्सेक सुदूरपश्चिम प्रदेशके आयोजनामे बुधके रोज धनगढीमे आयोजना कैगिल ‘कानून निर्माण प्रक्रियामे नागरिक समाजके भूमिका विषयक परामर्श कार्यक्रममे अपने पाई पर्ना सेवासुविधाके कानून हाली निर्माण करल मने जनजिविका सम्बन्धी कानून निर्माणमे ढिलाई कैटी रहल नागरिक अगुवाहुक्रे बटैले रहिट । परामर्श कार्यक्रममे पत्रकार लोकेन्द्र विष्ट जनताके जिविकासंग जोरल कानून नइबनाइल मने राजनितिक प्रतिवद्धता अनुसार कानून निर्माणमे ढेर ध्यान डेहल बटैलै । उहाँ प्रदेश सभा विजनेश विहिन हुइल कारण महिनौ बैठक बैठे नइसेकल, टमान कानून बनाइल मने संशोधन कैनामे ढेर समय खर्चे परल बटैलै । पत्रकार महासंघ कैलालीके अध्यक्ष हिमालय जोशी प्रदेश सरकारसे जेकर सवालमे कानून बनैना हो ओइनसे गहन छलफल नइकरल ओरसे अइना दिनमे सम्बन्धित वर्ग समुदायसे सुझाव लेके आघे बह्रना सुझाव डेलै । अधिवक्ता जोहारीलाल चौधरी न्याययुक्त, आवश्यकताके आधारमे ऐनकानून नन्ना जरुरी रहल बटैलै । उहाँ कहलै, प्रदेश सरकार ढेर ऐन कानून नानसेकल ओरसे कार्यान्वयनमेफे ध्यान डेहे परल, कानून संख्यात्मक नाही गुणात्मक व्यवहारमे लागु हुइना मेरके हुई परल ।
अधिवक्ता सर्जु चौधरी ऐन कानून बनाईबेर भुगोल माटी, जनताके अवस्था हेरके बनाई पर्ना जरुरी रहल बटैलै । कानून के मस्यौदा नन्ना पहिले क्षेत्रगत रुपमे छलफलमे उहाँ जोड रहिट । उहाँ कहलै, कैलाली कञ्चनपुरमे थारु समुदायमे रहल बडघर प्रथा बा । उहीहे कुछ न्यायिक अधिकार डेलेसे न्यायमे कुछ सहयोग पुगे सेकठ । बार कैलालीके अध्यक्ष सिद्धराज ओझा कानूनके मस्यौदा नानेबेर विज्ञहुकनके सक्रिय सहभागिता नइरहल बटैलै । उहाँ कहलै, विद्येयक तयार हुके टेबुल टक हुईबेर मजा बाट हटैना प्रवृतिके कारण बनल ऐन कानून जनता अपनत्व करे नइसेकल हुइट । जनजिविकाके सवालमे कानून बनाईबेर कोरोना कारण डेखैना मने पार्टीके सभा सम्मेलनमे हजारौंके सहभागितामे कार्यक्रम कैना डेखगिल बा । राष्ट्रिय दलित समाज कल्याण संघके अध्यक्ष चक्र विक प्रदेश सरकारसे दलित, मुक्तहलिया ओ अपाङगता सम्बन्धी विद्येयक नन्नामे ढिलाई करटी रहल बटैलै । मैनामोती चौधरी मुक्तकमैया पुनस्र्थापनाके सवालमे प्रदेश सरकार चुक्टी रहल बटैली । उहाँ कहली, संघीयता आइलपाछे मुक्तकमैया पुनस्र्थापना समस्या समाधानके लाग स्थानीय तहहे जिम्म्मा डेहल मने ओइने मुक्तकमैयाके तथ्याङक समेट नइधारल भेटल बा । धनगढी उपमहानगरपालिका–८ के अध्यक्ष नारायण बराल उपमहानगरपालिका ४०÷४५ ठो कानून बनाइल मने सक्कु क्षेत्रके समन्वय कार्यमे कमी कम्जोरी डेखल स्वीकार करलै ।
प्रदेशसभा सदस्य शान्ती नेपाली प्रदेश सरकारसे बनाइल कानून कार्यान्वयन नइहुइना, कानून बनैना आघे अध्ययनके कमी डेखल कारण समस्या अइटी रहल बटैली । नागरिक १६ बर्षमे नागरिकता पैना, १८ बर्षमे भोट डारे पैना ओ २० बर्षमे भोज करे पैना कैसिन कानून हो कहटी, कतिपय बनल कानून अपनेआपमे बझटी रहल उहाँ बटैली । कानून दाराजमे ठन्काइक लाग नाही कार्यान्वयनके लाग बनाइल उहाँ बटैली । सुदूरपश्चिम प्रदेशके मुख्यन्यायधिवक्ता तथा कानून मस्यौदा समिति संयोजक कुलानन्द उपाध्याय संघ, प्रदेश ओ स्थानीय तहके लाग बन्ना साझा कानूनमे बाट बझटी रहल बटैलै । दक्ष कर्मचारी नइहुइल कारणसेफे ऐन कानून बनाईबेर समस्या आइल उहाँ बटैलै । संघसे बनाई पर्ना कानून निर्माणमे ढिलाई हुइल कारण प्रदेश ओ स्थानीय तहमेफे ढिलाई हुइटी रहल समिति संयोजक उपाध्याय बटैलै ।
आन्तरिक मामिला तथा कानून मन्त्री पूर्णा जोशी संचार नीति छलफलमे नन्ना, सुरक्षा नीति बनैना चरणमे रहल बटैली । खुला सिमा नाकाके कारण सुदूरपश्चिम सुरक्षित नइरहल उहाँ बटैली । उहाँ कहली, प्रहरीहे अनुसन्धान कैदेउ कहिके आग्रह कैना अवस्था बा, प्रहरी विद्येयक समितिमे पठैले बटी, प्रहरी समायोजन विद्येयक आसेक्लेसेफे बैशाखी लेके प्रदेश संचालन कैना अवस्था बा । ‘सुरक्षा नइहो कलेसे सरकार कैसिक संचालन हुईना बाटमे सक्कुहुनके गम्भीरयता बा’, मन्त्री जोशी कहली, ‘उ अभाव सब जाने महशुस करटी, कतिपय नागरिकहुकनके जिउधनके सुरक्षाके मामिलामे प्रहरीहे परिचालन कैना अवस्था रहठ ।’ प्रहरी अपन नइरहलपाछे ढेर चिज गुमाई परलहस उहाँ बटैली । हिउदे अधिवेशनमे नागरिकके अधिकारके सवालमे कानून बनैनाफे उहाँ प्रतिबद्धता जनैली ।
कार्यक्रममे विद्यायन समिति सभापति नेपालु चौधरी प्रदेश सरकार ५७÷५८ ठो कानून बनासेकल बटैलै । उहाँ कहलै, कतिपय ऐन कानून कार्यान्वयन हुइल ओ कतिपय कार्यान्वयन हुइना अवस्था रहल बटैलै । प्रदेश सरकार नन्टी रहल निजामति ऐनमे राना ओ थारु कोटाके बाटफे उठल बटैलै । प्रदेश सभा सदस्य टेकबहादुर रैका अनुसन्धान करके बनाइल कानून कार्यान्वयनमे कौनो कठिनाइ नइहुइना बटैलै । परामर्श कार्यक्रममे इन्सेकके कार्यक्रम व्यवस्थापक सम्झा श्रेष्ठ नीति निर्माणमे नागरिक सहभागिता सवांद विषयक आधारपत्र प्रस्तुत करल रहिट । कार्यक्रम इन्सेक प्रदेश संयोजक खडकराज जोशीके अध्यक्षतामे हुइल रहे कलेसे संचालन प्रलेख अधिकृत कृष्ण विक करले रहिट ।