तुल्नात्मक रुपमे शान्तिपूर्ण

पहुरा दैनिक डटकम । २०७९ जेठ १८ गते

धनगढी, १८ जेठ । यिहे गैल बैशाख ३० गते हुइल स्थानीय तह निर्वाचन २०७९ तुल्नात्मक रुपमे शान्तिपूर्ण रुपमे सम्पन्न हुइल पर्यवेक्षहुक्रे बटैले बटै । इन्सेक प्रदेश कार्यालयके आयोजनामे मंगरके रोज हुइल पर्यवेक्षण तथा अनुभव अदान प्रदान कार्यक्रममे पर्यवेक्षणमे खटल पर्यवेक्षकहुक्रे मतदान स्थलमे तयारीमे कमी रहल, निर्वाचनमे खटल कर्मचारी, प्रहरीके व्यवहार नइमजा रहलेसेफे मतदान शान्तिपूर्ण रुपसे सम्पन्न हुइल बटैले रहिट । सार्वङिण अपाङता विकास समाजके कार्यकारी निर्देशक नन्दराज भट्ट स्थानीय तह निर्वाचनके मतदान स्थल अपाङतामैत्री नइरहल, अपाङता, जेष्ठ नागरिक, अशक्त व्यक्तीहुकनफे लाइनमे बैठाइल बटैलै । उहाँ अइना निर्वाचनमे अपाङता डेस्कके स्थापना करे पर्ना बटैलै । निर्वाचनके बेला अपाङता रहल व्यक्तिहुकन ओसारेक लाग गाडीके व्यवस्था नइहुइलफे उहाँ बटैलै । पर्यवेक्षणमे खटल नियोकके देवी प्रसाद खनाल निर्वाचन शान्ति सुरक्षाके विच सम्पन्न हुइलेसेफे कर्मचारी ओ सुरक्षाकर्मीके कमीकम्जोरी डेखल बटैलै । पर्यवेक्षणमे खटल धनपति ढुङेल धनगढी उपमहानगरपालिका–३ मे रहल मतदान स्थल व्यवस्थित नइडेखल ओरसे निर्वाचन आयोगके ध्यान जाई पर्ना सुझैले रहिट ।

रेणु प्रधानश्रेष्ठ स्थानीय तह निर्वाचनमे पर्यवेक्षेणके क्रममे मतदान स्थलमे खटल कर्मचारी ओ प्रहरीके व्यवहारमे नइमजा पाइल ओरसुे अइना निर्वाचनमे सुधारे पर्ना जरुरी रहल बटैली । जसपा नेपालके प्रतिनिधि फुलमति महतों स्थानीय तह निर्वाचनके बेला भोजभटरे करे नइपैना आचारसाहितामे उल्लेख हुइलेसे गाउँमे व्यापाक भोजभटेर पार्टी कैगिल पाइल बटैली । उहाँ कहली, जेकर थेन पैसा बा । ओइने भोजभटेर कैना, जेकर पैसा नइहो ओइने का कैना । अइसिन गतिविधिसे चुनाव महंग हुइटी गैल उहाँ बटैली । नेकपा एमालेके लोकेन्द्र शाही निर्वाचनमे टमान स्वतन्त्र उम्मेदवारहुकन एक्के चुनाव चिन्ह देहल कारण पार्टीके चुनाव चिन्हा जैसिन हुइल बटैलै । मतगणनामे कर्मचारीके ज्ञानके कमी डेखलफे उहाँ बटैलै । राष्ट्रिय मानव अधिकार आयोगके प्रदेश प्रमुख मोहन जोशी कहल जैसिन आचारसहिताके पालना नइहुइल, राजनीतिक दलसे भारी भारी झण्डा बनाके प्रचार प्रसारमे लागल बटैलै ।

जिल्ला प्रशासन कार्यालय कैलालीके सूचना अधिकारी शिवराज जोशी निर्वाचनमे सुरक्षा व्यवस्था मजा रहल, निर्वाचनमे मतदाताहुक्रे मजा सहयोग करल ओरसे निर्वाचन शान्तिपूर्ण सम्पन्न हुइल बटैलै । निर्वाचन आयोग सुदूरपश्चिम प्रदेश प्रमुख प्रेमराज भट्ट गैल चुनावके तुल्नामे अवसिक चुनाव शान्तिपूर्ण रुपमे उल्लासके साथ सम्पन्न हुइल बटैलै । आबके निर्वाचन टेक्नोलोजी प्रयोग कैना जरुरी रहल उहाँ बटैलै ।  इन्सेक सुदूरपश्चिम प्रदेश कार्यालय,धनगढीके प्रलेख अधिकृत कृष्णबहादुर विश्वकर्मा निर्वाचन आयोगसे माग करल अनुरुप इन्सेकके २ सय ३५ जाने आयोगसे पर्यवेक्षणके लाग अनुमति प्राप्त करल बटैलै ।सुदूरपश्चिम प्रदेशके नौ जिल्लामे निर्वाचन आयोगसे अनुमति पाइल १६ जाने इन्सेकके कर्मचारी निर्वाचनके पर्यवेक्षण करल बटैलै । कार्यक्रममे इन्सेक सुदूरपश्चिम प्रदेश संयोजक खडकराज जोशी सहजीकरण करल रहिट ।

निर्वाचनके बेला कहाँ कैसिन घटना ?

कैलाली जिल्ला गोदावरी नगरपालिका– ६ बडैयामे नेपाली काग्रेसके कार्यकर्ता ओ नेकपा एमालेके कार्यकर्ताविच वैशाख २८ गते रात झडप हुइल । नेकपा एमालेसे वडाध्यक्षके उम्मेदवार जग्गु चौधरीके घर भिटर प्रवेश करके चौधरीउप्पर खुकुरी प्रहार करेबेर चौधरीके ज्यान जोगैना क्रमे एमालेके कार्यकर्ता बिन्तीराम चौधरीके बाया पखरामे गहिर चोट लागके घाहहिल हुइल रहिट कलेसे उहे क्रममे गोदावरी नगरपालिका– ६ निवासी नेकपा (एमालेके) बिन्तराम चौधरी, रविन चौधरी, सन्तोष सिंह, लक्ष्मी चौधरी, बसन्ती चौधरी ओ दिपक कठायत समेत घाहिल हुइल पाइल रहे । डोटी जिल्ला के आइ सिह गाउँपालिका–५ रानागाउँमे नेपाली कांग्रेसके कार्यकर्ता ओ एकीकृत समाजवादी पार्टीके कार्यकर्ता बीच वैशाख २७ गते साँझ झडप हुके स्थानीय धर्म भुलके पाँच वर्षीय छावा कालु भुलके हात टुटल कलेसे झडपके क्रममे नेपाली कांग्रेसके कार्यकर्ता योगेन्द्र शाही, ललित शाही, कर्ण शाही ओ एकीकृत समाजवादीके कार्यकर्ता रोशन मल्ल ओ जय भुल सामान्य घाहिल हुइल रहिट ।

दार्चुला जिल्ला दुहु गाउँपालिका–५ मे नेकपा एमालेसे वडा अध्यक्षके उम्मेदवार मानसिंह बडाल निर्वाचन प्रचार प्रसार करके लौटना क्रममे गठबन्धनके कार्यकर्तासे वैशाख २७ गते आक्रमण करके कुटपिट करलपाछे एमाले ओ गठबन्धनके कार्यकर्ताबिच झडप हुइल रहे । ओस्टेक करके शैल्यशिखर नगरपालिका वडा नम्बर ६ के पशुपति भवन माविमे नेपाली कांग्रेस ओ नेकपा एमालेके कार्यकर्ताबीच मतदान केन्द्रमे झडप हुइलपाछे अवस्था नियन्त्रणमे लेना प्रहरी ५ राउण्ड हवाइफायर करल जिल्ला प्रहरी प्रमुख डिएसपी प्रतिक विष्ट बटैलै । बैतडी जिल्ला पुरचौडी नगरपालिका–५ कुवाकोटस्थित सल्लेली गाउँमे वैशाख २८ गते रातके कांग्रेस ओ माओवादी कार्यकर्ताबीच झडप हुइलपाछे माओवादीसे वडा नम्बर ५ के वडासदस्यके उम्मेदवार नरेश बोहरा ओ कांग्रेसके गोपाल बोहरा घाहिल हुइल रहिट । स्टेचरमे बोक्के स्थानीय तह निर्वाचनमे मतदान करे लैजैना क्रममे पाटन नगरपालिका–६ के ६८ वर्षीय दम तथा और रोगसे पीडित कमलसिंह विष्टके मृत्यु हुइल रहे । ओस्टेक करके मतदान करके लौटना क्रममे दोगडाकेदार गाउँपालिका–३ स्थित सनातन धर्म मावि श्रीकोट मतदान केन्द्रमे दोगडाकेदार–३ कफल्टाके ८४ वर्षीय हरिसिंह भाटके मृत्यु हुइल रहे ।

सुर्नया गाउँपालिका–२ के ३० वर्षीय मोहनराम विकहे वासुदेव मावि लिस्किटामे रहल मतदान केन्द्रमे भोट डारे गैल समयमे नेकपा एमाले ओ राप्रपाके कार्यकर्ता विक्रम बिष्ट, दिनेश विष्ट, हरजीत विष्ट, संग्राम विष्टलगायतल वैशाख ३० गते रखेदके कुटपिट करके भिरसे गिराइलपाछे विकके दाँया गोरक हड्डी खुस्कल जिल्ला प्रहरी कार्यालयका इन्स्पेक्टर लोकराज जोशी बटैले रहिट । घटनामे संलग्न आरोपितहुकनहे गिरफ्तार करके अनुसन्धान कैगिल बा । डिलाशैनी गाउँपालिका– ५ निवासी नेकपा माओवादी केन्द्रसे सदस्य पदके उम्मेदवार ६० वर्षीय हरीराम साउदहे वैशाख १९ गते रातके खुकुरी प्रहार करके घाहिल बनाइल आरोपमे प्रहरी उहे ठाउँ निवासी नेकपा एमालेके कार्यकर्ता अजीव साउदहे गिरफ्तार करल । खुकुरी प्रहारसे साउँदके मुरी, गोर ओ हातमे गहिर चोट लागके गम्भिर घाहिल हुइल रहिट । उहाँके स्वास्थ्य उपचार धनगढीमे करल रहे । कञ्चनपुर जिल्ला कृष्णपुर नगरपालिका–९ राजघाटमे स्थानीय तह निर्वाचनके मौन अवधिके क्रममे मतदाताहुकनहे पैशा बाँटल आरोपमे प्रहरी नेपाली कांगे्रसके कार्यकर्ता करन महराहे वैशाख २८ गते रात गिरफ्तार करल । मतदाताहुकनहे पैशा बाँटल सूचना प्राप्त हुइलपाछे महराहे २ लाख २२ हजार ६ सय ८० रुप्या सहित राजघाटसे गिरफ्तार करल जिल्ला प्रहरी कार्यालयके डिएसपी चक्र शाही बटैलै ।

ओस्टेक करके पुर्नवास नगरपालिका–१० बिजय माध्यमिक विद्यालय मतदानस्थलमे वैशाख ३० गते हुइटी रहल निर्वाचनके क्रममे नेकपा माओवादी केन्द्रके कार्यकर्ताहुक्रे फर्जी मतदाताहुकनहे मतदान करे लगाइल विषयमे बिवाद हुके निर्वाचन स्थगित हुइल । स्थगित हुइल उ मतदानस्थलमे जेठ ३ गते कडा सुरक्षा व्यवस्था सहित फेरसे मतदान कार्य सम्पन्न हुइल । अछाम जिल्ला साँफेबगर नगरपालिका–११ बाब्लास्थित मतदानस्थलमे वैशाख ३० गते सत्तारुढ गठबन्धन –नेपाली कांग्रेस ओ नेपाल कम्युनिष्ट पार्टी)(एकीकृत समाजवादी) ओ नेकपा (एमाले) पक्ष बीच झडप हुके शिक्षक तिलक कुँवरसहित तीन जाने घाहिल हुइल रहिट । पञ्चदेवल विनायक नगरपालिका–५ लयाँटीमे स्वतन्त्र उम्मेदवार पक्ष ओ कांग्रेसके कार्यकर्ताबीच झडप हुइलपाछे चार जाने घाहिल हुइल रहिट । बझाङ जिल्ला जयपृथ्वी नगरपालिका–७ सुवेडाके सुनिपिपल चौर माविके मतदान केन्द्रमे गठबन्धनके उम्मेदवारके ओरसे एजेन्ट बैठल रमादेवी जोशी मतपेटिकामे लात मारलपाछे विवाद हुके झडप हुइल रहे । झडपके क्रममे गठबन्धनके माधव जोशी घाहिल हुइलै कलेसे निर्वाचन स्थगित करल रहे ।  ओस्टेक करके सुर्मा गाउँपालिका–२ के आधाबगर मावि डोगडी ओ वडा नम्बर ३ मे रहल कृष्ण प्रावि काटैमे अशक्तहुकनके मत डरना क्रममे गठबन्धन ओ एमालेके एजेन्टबीच विवाद उत्पन्न हुइलपाछे मतदान कार्य स्थगित करल रहे ।

ओस्टेक करके केदारस्युँ गाउँपालिका–४ जगनाथ मावि शैन्सुमे रहल मतदान स्थलमे राजनितिक दलके कार्यकर्ता विच विवाद हुके मतदान कार्य स्थगित करल रहे । स्थगित हुइल जिल्लाके चारु ठो मतदानस्थलमे जेठ ३ गते कडा सुरक्षाके बीच फेरसे मतदान कार्य सम्पन्न हुइल रहे । बाजुरा जिल्ला बुढीनन्दा नगरपालिका–८ के मतदानस्थलमे नेपाली कांग्रेस ओ नेकपा एमालेके कार्यकर्ताबिच वैशाख ३० गते झडप हुइलपाछे पार्टीके कार्यकर्ताहुक्रे हातमे खुकुरी, तरवार, आसी, हतौडा लगायतके हातहतियार नानके आई लागलपाछे मतदान स्थगित करल बुढीनन्दा नगरपालिकाके निर्वाचन अधिकृत गोकर्णप्रसाद उपाध्याय बटैले रहिट । स्थगित हुइल मतदान कार्य कडा सुरक्षाके बीच जेठ ३ गते सम्पन्न हुइल । बडीमालिका नगरपालिका–२ मा एमालेबाट वडाध्यक्षका उम्मेदवार डम्बर महत चार मतसे विजय हुइलपाछे कांग्रेस ओ एमालेके कार्यकर्ताबिच जेठ १ गते विवाद उत्पन्न हुके झडप हुइटी रहल अवस्थामे घटनास्थल पुगल बुढीगंगा नगरपालिका–४ के २० वर्षीय म्यादीप्रहरी पुष्प कटुवालके मुरीमे खुकुरी प्रहार हुके गम्भिर घाइते हुइल म्यादी प्रहरी हर्क सुनार र सुनिल थापा समान्य घाहिल हुइल जिल्ला प्रहरी कार्यालयके इन्स्पेक्टर गिन्द्र बोगटी बटैले रहिट । घटनामे संलग्न हुइल आरोपमे बडिमालिका नगरपालिका–२ के २० वर्षीय नरेन्द्र नाथ ओ उहे ठाउँके २० वर्षीय लोकन्द्र कार्कीहे खुकुरी सहित गिरफ्तार करके अनुसन्धान करल इन्स्पेक्टर बोगटी बटैलेै ।

Source: https://pahura.com/2022/06/23176/