HUMAN RIGHTS NEWS PORTAL
निर्वाचन आचारसंहिताके पालना कैना आग्रह
पहुरा देली डटकम । २०७९ वैशाख ७ गते
धनगढी, ७ वैशाख । कैलालीके मुख्य निर्वाचन अधिकृत जयानन्द पनेरु आसन्न (बैशाख ३० गते) स्थानीय तहके निर्वाचनमे सक्कु राजनीतिक दलहुकनहे निर्वाचन आयोगसे जारी करल आचारसंहिताके पालना करना आग्रह करले बटैं । राष्ट्रिय मानव अधिकार आयोग सुदूरपश्चिम प्रदेश कार्यालय, निर्वाचन कार्यालय ओ अनौपचारिक सेवा केन्द्र (इन्सेक)के आयोजनामे स्थानीय तहके निर्वाचनहे स्वच्छ, निष्पक्ष तथा भयरहित रूपमे सम्पन्न करना सरोकारवालाके भूमिका ओ प्रतिवद्धता विषयक अन्तरक्रिया कार्यक्रममे मुख्य निर्वाचन अधिकृत पनेरु सक्कु दलहुक्रे निर्वाचन आयोगसँग समन्वय कैके आचारसंहितके कार्यान्वयन करेपरनामे जोड डेले रहैं । उहाँ निर्वाचनमे आचारसंहितासे निर्वाचनहे व्यवस्थित ओ मर्यादित बनैना लक्ष्य रहल ओरसे सम्बन्धित सक्कु सरोकारवाला, विशेष कैके राजनीतिक दल, निर्वाचन प्रक्रियामे संलग्न कर्मचारी, सुरक्षा बल ओ सञ्चारमाध्यम, निर्वाचनके आचारसंहितके पालना करेपरना बटैलैं ।
कार्यक्रममे कैलालीके प्रमुख जिल्ला अधिकारी किरण थापा जिल्लामे निर्वाचनके लाग सुरक्षा निकायलगायत अन्य सरोकारवाला संघसंस्थासँग सहकार्य ओ समन्वय करे परना बटैलैं । उहाँ निर्वाचनहे स्वच्छ, निष्पक्ष तथा भयरहित कराइक लाग निर्वाचनमे आचारसंहिता पालना करेपरना बटैलैं । उहाँ आसन्न निर्वाचनहे बिना पक्षपात, भेदभावरहित ओ भयरहित वातावरणमे सम्पन्न कैना प्रतिवद्धता व्यक्त करलैं । उहाँ कलैं, “निर्वाचनमे सुरक्षाके निकायसे किहुनहे फेन विभेद नैहुइ ।” ओस्टेके, कार्यक्रममे जिल्ला निर्वाचन अधिकृत प्रेमराज भट्ट निर्वाचनमे आचारसंहिता नैतिक ओ कानूनी बन्धन रहल ओरसे यकर कडा पालना आवश्यक ओ अनिवार्य रहल बटैलैं । उहाँ कलैं, “निर्वाचन आचारसंहिता टबकिल प्रभावकारी हुइठ, जब उल्लिखित बुँदाके बर्खिलाफ क्रियाकलाप करुइया तत्काल कारबाहीके भागीदार बन्ठैं ओ कारबाही करजाइठ ।” निर्वाचन आयोग २०७९ वैशाख ३० गते हुइना स्थानीय तह निर्वाचनहे लक्षित कैके ‘निर्वाचन आचारसंहिता, २०७८’ सार्वजनिक करले बा । निर्वाचनके मिति घोषणा हुइलपाछे आचारसंहिता लागू हुइना उल्लेख बा ।
आचारसंहिता उलंघन नैकरना प्रतिबद्धता
ओस्टेक, कार्यक्रममे कैलालीके राजनीतिक दलहुक्रे निर्वाचन आयोगसे बनाइल निर्वाचन आचारसंहिता उलंघन नैकरना प्रतिबद्धता जनैले बटैं । कार्यक्रममे नेकपा एकीकृत (समाजवादी) प्रमुख सचेतक दुर्गा विक अपन पार्टी आसन्न स्थानीय तहके निर्वाचनमे निर्वाचन आयोगसे तय करल आचारसंहिता पालना करना प्रतिवद्धता व्यक्त करलि । यहाँ अपन पार्टी भित्तरके सक्कु जनहनहे आचारसंहिता पालना कैना निर्देशन डेहल फेन बटैलि । नेकपा एकीकृत (समाजवादी) नेता दीर्घ जोशी प्रजातान्त्रिक तरिकासे निर्वाचनमे प्रतिस्पर्धाके लाग अपन पार्टी आचारसंहिताके पालना करना बटैलैं । जसपाके केन्द्रीय सदस्य फोनीराम चौधरी आसन्न निर्वाचनहे स्वच्छ, निष्पक्ष तथा भयरहित रूपमे सम्पन्न करना सबके दायित्व रहल बटैटि जसपा निर्वाचन आयोगसे तय करल आचारसंहिता पालना करना बटैलैं । ओस्टेक, जसपाके जिल्ला अध्यक्ष गयाप्रसाद कुश्मी फेन आचारसंहिता पालना करैनामे अपन पार्टी प्रतिवद्ध रहल बटैलैं । नेपाल लोकतान्त्रिक पार्टीके जिल्ला अध्यक्ष माधव थारु निर्वाचनमे निर्वाचन आयोजसे छोट–भारी पार्टीहे समान रूपमे हेरे परना बटैटि अपन पार्टी आचारसंहिताके पालना करना बटैलैं ।
कार्यक्रमे नेता कृष्ण चौधरी, गैरसरकारी महासंघके प्रदेश अध्यक्ष देवीप्रसाद खनाल, इन्सेकके सदस्य चित्रा पनेरू, पत्रकार कर्ण शाह, राष्ट्रिय मानव अधिकार आयोगके अधिकृत प्रकृति सिंहलगायत मन्तव्य व्यक्त करले रहैं । राष्ट्रिय मानव अधिकार आयोग सुदूरपश्मि प्रदेश प्रमुख मोहनदेव जोशीके अध्यक्षतामे हुइल कार्यक्रमके सहजीकरण इन्सेक सुदूरपश्चिम प्रदेश संयोजक खडकराज जोशी करले रहैं । ओस्टेक, जिल्ला प्रशासन कार्यालयमे बुधके हुइल छलफलमे उपस्थित भयरहित वातावरणमे स्वच्छ प्रतिस्पर्धा करक लाग सहयोग कैना बटाइल हुइट । निर्वाचनमे लोकतान्त्रिक पद्धतिमे प्रतिस्पर्धा हुइना आवश्यक रहल उहाँहुक्रे बटैले बटै । नेपाली काँग्रेसके जिल्ला सभापति नारायणदत्त भट्ट, माओवादी केन्द्रके जिल्ला समन्वय समिति संयोजक लाजुराम चौधरी, राजपाके जिल्ला अध्यक्ष गयाप्रसाद कुश्मी, नेपाल परिवार दलके खडक नागरी, नेपाल मजदुर किसान पार्टीके रमेशकुमार रावल लगायतके प्रतिबद्धता जनैले बटै ।