HUMAN RIGHTS NEWS PORTAL
बाल अधिकार चेतना समूहसे सडक नाटक प्रर्दशन
पहुरा डटकम । २०८० मङ्सिर २२ गते
हसुलिया, २२ अगहन । इन्सेकके सहयोगमे कैलारी गाउँपालिकास्तरीय मानव अधकार समूह, बाल अधिकार चेतना समूह ओ राष्ट्रिय माध्यामिक विद्यालयके संयुक्त आयोजनामे बाल अधिकार चेतना समूहसे लैङिक हिंसा विरुद्धके १६ दिने अभियान अन्तर्गत शुकके रोज सडक नाटक तथा वक्तृत्वकला प्रतियोगिता हुइल बा ।
राष्ट्रिय माध्यामिक विद्यालयमे गठित बाल अधिकार चेतना समूहसे समुदायमे कुप्रथाके रुपमे रहल बोक्सी प्रथा विरुद्ध सडक नाटक ओ महिला हिसांके अन्त्यके लाग विद्यार्थीके भुमिका विषयक वक्तृत्वकला प्रतियोगिता हुइल हो ।
कैलारी गाउँपालिकास्तरीय मानव अधिकार समूहके सचिव ज्ञानु चौधरी समाजमे बोक्सीके नाममे महिला हिंसा हुइना करल ओरसे यैसिन कुप्रथाहे न्यूनीकरण कैना सचेतनाके लाग निरन्तर रुपमे मेरमेराइक तरिकासे सचेतना जगैना आवश्यक रहल बटैलै ।
उहाँ कहलै,– ‘हमार समाजमे सामाजिक मुल्यमान्यताके कारण अभिनफे बोक्सी जैसिन कुप्रथाहे मन्टी आइल ओरसे समुदायमे बोक्सीके आरोपमे हिंसा करुइयाहे दण्ड डेहे पर्ना ओ सचेतना फैलैना आवश्यक बा ।’
ओस्टेक करके घोडाघोडी नगरपालिका—१० पहलमानपुरस्थित कान्ति राज्यलक्ष्मी माध्यामिक विद्यालयके बाल अधिकार चेतना समूहसे लैङिक तथा अल्पसख््यक समुदायसे भोग्टी आइल विभेद सम्बन्धमे सडक नाटक ओ महिला हिसांके अन्त्यके लाग विद्यार्थीके भुमिका विषयक वक्तृत्वकला प्रतियोगिता हुइल बा ।
घोडाघोडी नगरपालिकास्तरीय मानव अधिकार समूहके अध्यक्ष आशा परियार लैङिक तथा अल्पसख््यक समुदायसे अभिनफे अपन समस्या खोलके कहे नइसेकल ओरसे मानसिक समस्या तथा डिपे्रशनमे जैना जैसिन समस्या भोग्टी आइल ओरसे लैङिक तथा अल्पसख््यक समुदायके सवालहे उजागर करके नाटक डेखाइल ओरसे बाल अधिकार चेतना समूहहे धन्यवाद डेलै ।
ओस्टेक करके घोडाघोडी नगरपालिका—२ साडेपानीस्थित दशरथ माध्यामिक विद्यालयके बाल अधिकार चेतना समूहसे बालविवाह विरुद्ध सडक नाटक प्रदर्शन करले बटै ।
दशरथ माध्यामिक विद्यालयके सहायक प्रधानाध्यापक खगेन्द्र चन्द उमेर नइपुग्टी बालबालिकासे भागके भोज कैना कारण समाजमे बालविवाह बढल ओ बालविवाहके कारण बालबालिकाहुकनके व्यक्तित्व विकास हुई नइसेक्के आर्थिक, मानसिक, पारिवारिक तथा समाजिक समस्यासे हिसां बढाइल बटैलै ।
सडक नाटक तथा वक्तृत्वकला प्रतियोगितामे टमान विद्यार्थी भाग लेहल रहिट कलेसे कार्यक्रममे मानव अधिकार समूहके पदाधिकारी, शिक्षक, अभिभावक ओ विद्यार्थीहुकनके सहभागिता रहल रहे ।