यी बरस २ सय ४४ पीडित

पहुरा डटकम । २०७८ पुस २१ गते

धनगढी, २१ पुस । गैल बरसके तुलनामे यी बरस मानवधिकार उलंघनके घटनामे बृद्धि हुइल इन्सेक प्रदेश कार्यालयके अभिलेखमे डेखल बा । नेपाल मानवअधिकार वर्ष पुस्तक २०२२ प्रकासन पूर्व मंगरके रोज धनगढीमे वार्षिक समिक्षा कार्यक्रममे सन २०२१ जनवरीसे सन २०२१ दिसेम्बरके अवधिमे कैलाली जिल्लामे संकलन करल २ सय २४ घटनामे २ सय १५ जाने महिला ओ २९ जाने पुरुष करके २ सय ४४ पीडित हुइल इन्सेक प्रदेश संयोजक खडकराज जोशी बटैलै । ओम्नेसे राज्य पक्षसे केल १४ जाने पुरुष पीडित हुइल उहाँ जनैलै । गैल बरस १ जाने ८३ जाने पीडित हुइल रहिट । राज्य पक्षसे २२ जाने पीडित हुइल रहिट । अशौ एक बर्षके अवधिमे घरेलु हिंसासे १ सय २२ जाने, बलात्कारसे २० जाने बलात्कारके प्रयाससे १० जाने, बेचविखनसे सात जाने ओ बहुविवाहसे १७ जाने महिला पीडित हुइल उहाँ जनैलै । ओस्टेक करके बलात्कारसे २० जाने, बेचविखनसे ६ जाने, यौनदुव्र्यवहारसे ६ जाने, बलात्कार प्रयाससे तीन जाने बालिका पीडित हुइल संयोजक जोशी बटैलै ।

कथित बोक्सीके आरोपसे एक जाने महिला पीडित हुइल, आत्महत्या दुरुत्साहनसे दुई जाने महिला आत्महत्या करल घटना अभिलेख करल ओ एक जाने बालिकाके बलात्कार पश्चात हत्या हुइल संयोजक बटैलै । यी अवधिमे राज्यपक्षसे एक जाने उप्पर दुव्र्यवहार, प्रहरीके गोली लागके दुई जाने घाहिल, १० जाने गिरफतार करल, गैरराज्यपक्षसे चार जनहनहे कुटपिट ओ तीन जनहनहे धम्की डेहल, गैरराज्यपक्षसे धरियार हतियार प्रयोग करके आठ जाने पुरुषके हत्या करल घटना इन्सेकसे अभिलेख करले बा ।

जिल्ला प्रहरी कार्यालय कैलालीके प्रमुख एसपी विश्व अधिकारी प्रहरी हरेक समुदायके मानवअधिकारके लाग लग्लेसेफे कतिपय छानविन हुइटी रहल घटनामे पीडित पक्षसे अवरोध करल बटैलै । लम्कीके बडुवाल हत्या घटनाके पीडित पक्षसे प्रहरी कार्यालय, अदालत घेराउ कैनाके साथे अनुसन्धान बाधा पुगल बटैलै । कार्यक्रममे राष्ट्रिय मानव अधिकार आयोग प्रदेश संयोजक मोहनदेव जोशी, इन्सेकके प्रलेख अधिकृत कृष्ण विक, इन्सेकके जिल्ला प्रतिनिधि मैनामोती चौधरी लगायत इन्सेकसे फागुन ७ गते प्रकाशित कैना ३० औं अंकके बर्ष पुस्तकके बारे अपन बाट धारल रहिट ।

१७३ अपाङ्ता रहल व्यक्तिनहे दैलोमे खोप

भजनी नगरपालिकाके १ सय ७३ जाने अपाङगता रहल व्यक्ति घरदैलोमे कोरोना विरुद्धके खोप पैले बटै । दिगो विकास समाज भजनी, कर्डएड, लुथ्ररन विश्व फेडरेशन नेपालके सहयोगमे कोभिड रेस्पोन्स परियोजना अन्र्तगत सार्वङगीण अपाङता विकास समाज नेपालके स्थानीय व्यवस्थापनमे भजनी स्वास्थ्य शाखा ओ महिला तथा बालकालिका शाखाके समन्वयमे पुसके २ से ४ गतेसम करल घरदैलो खोप अभियानमे ८३ महिला ओ ९० पुरुष करके १ सय ७३ जाने अपाङता रहल व्यक्तिहुनके कोरोना विरुद्धके खोप पाइल अपाङता अधिकारकर्मी नन्दराज भट्ट बटैलै ।

Source: https://pahura.com/2022/01/19965/