मधेश प्रदेशमा ‘जंक फूड’ प्रतिबन्ध गर्न सुझाव

इकान्तिपुर डटकम । २०८२ चैत २७ गते

जनकपुर — विद्यालय र समुदायमा जंक फूडको प्रयोग र विक्रीवितरणमा प्रतिबन्ध लगाउनुपर्ने माग गर्दै बालअधिकारका क्षेत्रका कार्यरत संघसंस्थाले मधेश प्रदेश सरकारलाई सुझावपत्र बुझाएको छ ।

मधेश प्रदेश सरकारको अगामी आर्थिक वर्ष ०८३/०८४ को नीति तथा कार्यक्रम र बजेटमा बालबालिकाका समस्या हल हुनेगरी नीति र योजना ल्याउन सुझाव दिइएको हो ।

मधेश प्रदेश बाल क्लब सञ्जाल र बाल अधिकारको लागि नागरिक समाज सञ्जालले नीति तथा योजना आयोगलाई शुक्रबार बालबालिकाको हकहित समेटिएको सुझावपत्र हस्तान्तरण गरेका छन् ।

नीति तथा योजना आयोगकी सदस्य डा. शिला मिश्रलाई बाल क्लब सञ्जालका प्रतिनिधि सप्तरीका शिवशंकर मण्डल, धनुषाकी कल्पनाकुमारी साह र महोत्तरीकी महिमा साह, इन्सेकका प्रतिनिधि राजु पासवान र सबल नेपालका वीरबहादुर आलेले सुझावपत्र हस्तान्तरण गरेका छन् । बाल क्लब सञ्जालले मधेश प्रदेशका ८ वटै जिल्लाबाट बालबालिकाको हकहितका लागि संकलन गरेको सुझावका आधारमा प्रदेश सरकारलाई नीति र योजना ल्याउन सुझाव दिइएको आलेले जानकारी दिए ।

‘विद्यालय र समुदायमा नै जंक फूडको प्रयोगमा प्रतिबन्ध लगाउनुपर्ने सुझाव दिएका छौं,’ आलेले भने,‘जंक फूडले बालबालिकाको सर्वांगीण विकासमा समस्या परेको हाम्रो अध्ययनले देखाएको छ । त्यसैले प्रदेश सरकारले नीति नै ल्याएर जंक फूडको प्रयोगलाई रोक्नुपर्छ ।’ उनका अनुसार बाल बचाउ, बाल संरक्षण, बाल सहभागिता, बाल विकास र बालबालिका तथा जलवायु परिवर्तनको असरका क्षेत्रमा मधेश प्रदेश सरकारलाई बुँदागत सुझाव दिइएको हो ।

Source: https://shorturl.at/al96n