मानव अधिकार वर्ष पुस्तक २०२२ का लागि सङ्कलित घटनाको प्रकाशन पूर्व समीक्षा

रौतहट । २०७८ पुस ८ गते

नेपाल मानव अधिकार वर्ष पुस्तक २०२२ का लागि जिल्लामा सङ्कलन गरिएका मानव अधिकार उल्लङ्घन तथा ज्यादतीका घटनाहरूको प्रकाशन पूर्व वार्षिक समीक्षा गरिएको छ । जनवरीदेखि डिसेम्वर १५ सम्मको अवधिमा सङ्कलन गरिएका मानव अधिकार उल्लङ्घन तथा ज्यादतीका घटनाको पुस ८ गते रौतहटमा आयोजित एक कार्यक्रममा इन्सेक रौतहट प्रतिनिधि कोपिला तिमिल्सिनाले प्रतिवेदन प्रस्तुत गर्नु भएको थियो । प्रतिवेदनमा मानव अधिकार उल्लङ्घन तथा ज्यादतीका घटना ६४ ओटा उल्लेख छ । जसमध्ये बलात्कार प्रयासका १०,  बलात्कारका २८, बहुविवाहका ६, शिक्षकमाथि कुटपिटको एक, बलविवाहको एक, सामूहिक बलात्कारका दुई, एसिड प्रहारको एक लगायतका घटना समेटिएको छ ।

कार्यक्रममा निलहिरा समाजका प्रतिनिधि राधिका तिमल्सिनाले इन्सेकले समग्र मानव अधिकारको विषयमा वकालत तथा घटनाहरूको अभिलेखिकरण गर्दै आएकोले कार्यक्रम सराहनीय रहेको र तेस्रो लिङ्गीको विषयलाई पनि उठान गर्नुपर्ने बताउनु भयो । मानव अधिकार निगरानी समूह चन्द्रनिगाहापुरका सदस्य नर्मदा लामाले पीडितको न्यायका लागि सम्बन्धित निकायमा समन्वय गर्ने गरेको बताउनु भयो । इलाका प्रहरी कार्यालय चन्द्रनिगाहापुरका डिएसपी लिलाराज लामिछानेले जिल्लामा जनसङ्ख्या बढेकाले अपराध तथा उल्लङ्घनका घटना पनि बढेको बताउनु भयो । चन्द्रपुर नगरपालिकाकी उपप्रमुख रामरती चौधरीले इन्सेकको काम मर्यादित, अनुशासित र सत्य तथ्यमा आधारित हुने भएकाले इन्सेकलाई धन्यवाद दिनु भयो । उहाँले आगामी दिनहरुमा अझै सुक्ष्म ढङ्गले घटनाहरुको अभिलेख राख्न आग्रह गर्नु भयो ।

अनलाइन डेस्क