आयोगके अध्यक्ष ओ सदस्यके नियुक्ती पारदर्शी हुई पर्ना माग

पहुरा दैनिक डटकम । २०८१ कात्तिक २९ गते

धनगढी । वेपत्ता पारल व्यक्तिके छानविन आयोग ओ सत्य निरूपण तथा मेलमिलाप आयोगके अध्यक्ष ओ सदस्यहुकनके नियुक्ती पारदर्शी हुई पर्ना माग करटी गठित समितिहे ध्यानकर्षण–पत्र बुझागिल बा ।

इन्सेक, एडभोकेसी फोरम, द्धन्द्धपीडित साँझा चौतारी, नेपाल, डिडब्लुआरएफ, ओरेक, महिला मानव अधिकार रक्षक सञ्जाल, मानव अधिकारका लागि महिला एकल महिला समूह, फाया नेपाल लगायतके संघसस्थाहुकनके सयुक्त टोलीसे विफेक रोज जिल्ला प्रशासन कार्यालयमार्फत बेपत्ता पारल व्यक्तिहुकनके छानविन आयोग ओ सत्य निरुपण तथा मेलमिलाप आयोगके अध्यक्ष ओ सदस्यहुकनके सिफारिस कैना गठित समितिहे ध्यानकर्षण–पत्र बुझाइल हो ।

वेपत्ता पारल व्यक्तिहुकनके छानविन आयोग ओ सत्य निरुपण तथा मेलमिलाप आयोगके अध्यक्ष ओ सदस्यहुकनके नियुक्ती पारदर्शी हुई पर्र्ना, योग्य व्यक्तिहुकनहे आयोगमे छनौट करे पर्ना ओ आयोगके अध्यक्ष, सदस्यक लाग आवेदन माग करल समय सात दिन अपुग हुइल ओरसे आवेदन डेना समय थप करे पर्ना लगायतके माग धारके प्रमुख जिल्ला अधिकारी धर्मेन्द्रकुमार मिश्रमार्फत सिफारिस समितिहे इन्सेक लगायतके संघसंस्थाके सयुक्त टोलीसे ध्यानकर्षण–पत्र बुझाइल हो ।

आयोगके अध्यक्ष वा सदस्यके लाग निवेदन डेहल निवेदकके निवेदनके आधारमे कैसिक, कौन प्रकृया ओ विधिसे हाली सूची प्रकाशन करजाइठ, छनोट प्रकृया पारदर्शी हुइल नैहुइल सुनिश्चित कैना सिफारिस समितिसे कस्तो मापदण्ड तयार परटी बा ?, सिफारिस करल व्यक्तिके सार्वजनिक सुनुवाई कैना कौनो योजना तयार पारल बा की नैहो ?, सिफारिस समितिसे सिफारिस करल व्यक्ति आयोगके पदाधिकारीके रुपमे नियुक्त हुइठै कना आधार का हो ? लगायतके प्रश्न ध्यानकर्षण–पत्रमे उल्लेख करल बा ।

एक हप्ताके अवधि धारके माग करल सूचनासे पर्याप्त निवेदन प्राप्त नइहुइनान ओ योग्य व्यक्तिसे निवेदन नैडेना सम्भावना रना हुइल ओरसे निवेदन डेना म्याद थप कैना समेत ध्यानकर्षण–पत्रमे उल्लेख करल बा ।

बेपत्ता पारल व्यक्तिके छानविन, सत्य निरूपण तथा मेलमिलाप आयोग ऐन, २०७१ के दफा ३ उपदफा (१) बमोजिम उच्चस्तरीय बेपत्ता पारल व्यक्ति छानविन आयोग ओ सत्य निरूपण तथा मेलमिलाप आयोगके अध्यक्ष ओ सदस्यके नियुक्तिके नाम सिफारिस कैना गठित समितिसे सूचना जारी करके आयोगके अध्यक्ष ओ सदस्यके लाग आवेदन माग करल हुइलेसेफे एक हप्ताके समय अप्रयाप्त हुइल ओ यिहीसे दक्ष तथा योग्य व्यक्तिके आवेदन डेहे नैसेक्ना अवस्थासे नम्मा समयसे सम्बोधन हई नैसेक्ना संक्रमणकालिन न्याय प्रक्रिया प्रभावकारी नैहु्इना डेखल ओरसे सिफारिस समितिके ध्यानकर्षण करल इन्सेक सुदूरपश्चिम प्रदेश कार्यालय, धनगढीके संयोजक खडक्राज जोशी बटैलै ।

द्वन्द्वपीडितहुकनके परिपूरण, नागरिकता तथा टमान मेरिक सिफारिस कैना सन्दर्भमे जिल्ला प्रशासन कार्यालयसे सहजीकरण करटी आइल ओ इन्सेकलगायतके संघसंस्थासे डेहल ध्यानकर्षण–पत्र सम्बन्धित निकायमे सम्प्रेषण करके जानकारी करैना प्रमुख जिल्ला अधिकारी धर्मेन्द्रकुमार मिश्र बटैलै ।

Source: https://shorturl.at/r3MTC