गाँउपालिकालाई बालमैत्री बनाउन प्रतिबद्ध छौः अध्यक्ष केसी
कास्की । २०८० जेठ ३ गते
अन्नपूर्ण गाउँपालिका अध्यक्ष बिष्णुबहादुर केसीले आगामी २०८३ भित्र अन्नपूर्ण गाँउपालिकालाई पूर्णरुपमा बालमैत्री बनाउने प्रतिबद्धता जनाउनुभयो । अनौपचारिक क्षेत्र सेवा केन्द्र (इन्सेक) गण्डकीको आयोजना तथा सामाजिक विकास कार्यालयको सहयोगमा जेठ २ गते अन्नपूर्ण गाउँपालिकामा बालमैत्री स्थानीय शासन सम्बन्धी अन्तरक्रिया कार्यक्रममा अध्यक्ष केसीले उक्त कुरा जनाउनुभएको हो । उपाध्यक्ष चन्द्रकला अधिकारीले बालमैत्री स्थानीय शासनका बारेमा विभिन्न तालिमहरू आयोजना भएपनि स्थानीय सरकार आएपछि बल्ल जानकारी पाएको सुनाउनु भयो । उहाँले पालिकाले बालमैत्री स्थानीय शासनमा हस्ताक्षर गरी सकेकाले अब कामको थालनी गर्ने बताउनु भयो ।
प्रमुख प्रशासकीय अधिकृत खेमराज दवकोटाले बालबालिकाले पाउनुपर्ने अधिकारका लागि गाउँपालिकाले पहल गर्नुपर्नेमा जोड दिनु भयो । घर, विद्यालय र सार्वजनिक विद्यालयमा पनि बालमैत्री वातावरण हुनुपर्ने उहाँले बताउनु भयो । शिक्षा शाखा प्रमुख बलराम भुगाईँले गाउँपालिकालाई बालश्रम मुक्त पालिका घोषणा गर्ने तयारी रहेको बताउनु भयो । इन्सेक गण्डकीका संयोजक शिव खकुरेलले बालमैत्री स्थानीय शासनका लागि सरकारी तवरबाट पहल हुनुपर्ने र संस्थाले हातेमालो गर्दै आइरहेको बताउनु भयो । राष्ट्रिय बाल अधिका परिषद् गण्डकीका संयोजक बद्री वाग्लेले बालमैत्री अभियानमा सबै लाग्नुपर्ने बताउनु भयो ।
नारायण केसी