/// Insec In News \\\

पहुरा समाचारदाता
धनगढी,७ बैशाख । अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय, धनगढीके आयोजना ओ डिसिएके आर्थिक सहयोगमे मानव अधिकार रक्षकके सुरक्षा ओ संरक्षणमे राज्यके दायित्व विषयक प्रदेश स्तरीय अन्तरक्रिया कार्यक्रम मंगरके रोज धनगढीमे हुइल बा । अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश संयोजक खडकराज जोशी मानव अधिकार रक्षकहुक्रे सरकारके विरोधी नइहुके सहयोगीके रुपमे काम कैना हुइलेसेफे मानव अधिकार रक्षकके सुरक्षा ओ संरक्षण कैना राज्यसे जिम्मेवारी हुई पर्ना बटैले बटै । अधिबक्ता अच्युट आचार्य मानव अधिकारकर्मीहुकनके सुरक्षा ओ संरक्षण सम्बन्धी आदेश २०७७ हे प्रस्तुतिकरण करल रहिट ।

सुदूरपश्चिम प्रदेश, विधायन सभा समितिके अध्यक्ष नेपालु चौधरी प्रदेश सभासंग कानून बनैना अधिकार रहेलेसेफे निर्मित कानूनके कार्यान्वयन कैना सुरक्षा निकाय अपन संयन्त्र अन्तर्गत नइरहल ओरसे कार्यान्वयन कैना कठिनाई रहल बटैलै । उहाँ कहलै— ‘मानव अधिकारके सुरक्षा संरक्षणके लाग प्रदेश सरकारहे गृह मनत्रालयसे जारी मानव अधिकारकर्मीहुकनके सुरक्षा ओ संरक्षण सम्बन्धी आदेश २०७७ मे विधायन समिति मार्फत छलफल करके विधेयक नन्ना दवाब डेना बटैलै ।’ सुदूरपश्चिम प्रदेशसभा सदस्य पुर्णा जोशी मानव अधिकारकर्मीहुक्रे प्रत्यक्ष नागरिकसंग काम कैना ओरसे टमान चुनौती ओ समस्या भोगे पर्ना हुइल ओरसे समग्र मानव अधिकारके क्षेत्रमे काम कैना मानव अधिकारकर्मीहुकनके सुरक्षाके ग्यारेन्टी राज्यसे करे पर्ना बटैलै ।

प्रदेश प्रहरी कार्यालयके प्रमुख डिआइजी उत्तम सुवेदी मानव अधिकारके सुरक्षा ओ संरक्षणमे नेपाल प्रहरीके पहिल भुमिका रहल ओरसे वानी संहिता लागु हुइलठेनसे ढेर सुधार हुइल बटैटी सूचनाके अधिकारहे पारदर्शी ओ प्रभावकारी बनाइक लाग पहल करटी रहल बटैलै । मानव अधिकार रक्षक संजाल सुदूरपश्चिम प्रदेश संयोजक टंकप्रसाद ढुङ्गाना मानव अधिकार रक्षकहुक्रे सरकारके सहयोगीके भुमिकामे काम करलेसेफे ओइनके सुरक्षा ओ संरक्षणके लाग कौनो पहल नइकरल गुनासो करलै । नेपाल पत्रकार संघ सुदूरपश्चिम प्रदेश सचिव हरी जोशी मानव अधिकार रक्षकहुकनहे सुरक्षा निकायसे समयमे ओ सही सुचना नइपाके समाचार सम्प्रेसन कैना समस्या रहल गुनासो करलै ।
जिल्ला बार एशोसिएशनके अध्यक्ष सिद्धराज ओझा मानव अधिकारकर्मीहुक्रे अधिकारके क्षेत्रमे काम करेबेर कर्तव्यफे बिस्राई नइहुइना बटैलै । सुन्दर जैरु मानव अधिकारसंग सम्बन्धित कानूनके सही कार्यान्वयन करलेसे गृह मन्त्रालयसे जारी मानव अधिकारकर्मीहुकनके सुरक्षा ओ संरक्षण सम्बन्धी आदेश २०७७ हे प्रदेश सभामे कानून बनाके कार्यान्वयन करे पर्ना बटैलै ।

Source: https://pahura.com/2021/04/14489/