HUMAN RIGHTS NEWS PORTAL
‘१६ दिने अभियानमा ६२ हिंसाका घटना’
नयाँ पत्रिका डटकम । २०८० मङ्सिर २६ गते
लैंगिक हिंसाविरुद्धको १६ दिने अभियानमा ६२ वटा महिला तथा बालिकाविरुद्ध हिंसात्मक घटना भएको पाइएको छ। अनौपचारिक सेवा केन्द्र (इन्सेक)ले सार्वजनिक गरेको प्रतिवेदनमा बाल अधिकारसम्बन्धी १९, महिला अधिकारसम्बन्धी ३९ र चारवटा हत्याका घटना भएको जनाइएको हो। बालअधिकारमा १३ बलत्कार, चार यौन दुर्व्यवहार, दुई बेचबिखनका छन्। यस्तै, महिला अधिकारमा सातवटा बेचबिखनको प्रयास, पाँच बालत्कार, १३ घरेलु हिंसा, एक यौन दुर्व्यवहार, पाँच बेचबिखनका घटना अनुगमनका क्रममा पाइएको इन्सेकका अध्यक्ष डा. कुन्दन अर्यालले सार्वजनिक गरेको विज्ञप्तिमा जनाइएको छ।
सबैभन्दा बढी हिंसाका घटना मधेश प्रदेशमा २६ वटा छ। त्यसपछि बागमती प्रदेशमा १२, लुम्बिनी प्रदेशमा ११, गण्डकीमा पाँच, कोशीमा चार, कर्णाली र सुदूरपश्चिममा दुई दुईवटा पाइएको जनाइएको छ। नेपालमा यही मंसिर ९ गतेदेखि २४ गतेसम्म (नोभेम्बर २५ देखि डिसेम्बर १०) ‘लैंगिक हिंसा अन्त्यको सुनिश्चिता : महिला र बालबालिकामा लगानीको ऐक्यबद्धता’ भन्ने नाराका महिला हिंसाविरुद्धको १६ दिने अभियान मनाइएको थियो। नेपालमा यस अभियानको थालनी सन २००४ देखि गरिएको हो। महिला तथा बालिकाविरुद्ध भएका हिंसात्मक घटनाका आधारमा प्रतिवेदन तयार पारेको इन्सेकले नेपालमा महिलामाथिको हिंसा विगतका वर्षमा भन्दा कम हुँदै आए पनि सन्तोषजनक नभएको जनाएको छ।