इन्सेकको रिपोर्ट- २०२५ मा मानव अधिकार उल्लंघन र ज्यादतीबाट साढे ११ हजार बढी पीडित

नेपाल प्रेस डटकम । २०८२ फागुन ७ गते

काठमाडौं । सन् २०२५ मा नेपालमा मानव अधिकार उल्लंघन तथा ज्यादतीका घटनामा वृद्धि भएको तथ्यांक सार्वजनिक भएको छ ।

भदौ २३-२४ को घटनाका कारण मानव अधिकार उल्लंघन तथा ज्यादतीका घटना बढेको प्रतिवेदनमा उल्लेख छ । जेन-जी आन्दोलनमा राज्यपक्षबाट भएको दमनका कारण पनि यस वर्ष मानवअधिकार उलंघनको घटना धेरै भएको बताइएको छ ।

अनौपचारिक क्षेत्र सेवा केन्द्र (इन्सेक) ले बिहीबार ललितपुरमा नेपाल मानव अधिकार वर्ष पुस्तक सार्वजनिक गर्दै सन् २०२५ मा मानव अधिकार उल्लङ्घन तथा ज्यादतीका घटनाबाट ११ हजार ५ सय ३८ जना पीडित भएको जनाएको हो ।

यसअघि सन् २०२४ मा यस्ता घटनामा १० हजार ७ सय ३४ जना पीडित भएको तथ्याङ्क सार्वजनिक भएको थियो । तथ्याङ्क अनुसार बागमती प्रदेशमा सवैभन्दा बढी र कर्णाली प्रदेशमा सबैभन्दा कम घटना भएका छन् ।
सन् २०२५ मा राज्यपक्षबाट २ हजार ७ सय ५ जना पीडित भएका छन् । यो संख्या अघिल्लो वर्षको तुलनामा निकै बढी हो, अघिल्लो वर्ष राज्य पक्षबाट ४ सय ५८ जना पीडित भएको थियो । त्यस्तै अन्य पक्षबाट भएका मानवअधिकार ज्यादतीका घटनाको संख्या ८ हजार ८ सय ३३ रहेको छ ।

इन्सेकका पूर्वअध्यक्ष डा. कुन्दन अर्यालले नेपालमा मानवअधिकारको अवस्था सुध्रिँदै जानुपर्नेमा अहिलेका अवस्थाले स्तब्ध भएको बताए ।

इन्सेकले सन् १९९२ देखि हरेक वर्ष नेपाल मानव अधिकार वर्ष पुस्तक सार्वजनिक गर्दै आएको छ ।

Source: https://shorturl.at/44A0i

Source: https://shilapatra.com/detail/178504

Source: https://shorturl.at/3zE97