HUMAN RIGHTS NEWS PORTAL
प्रदेश स्तरीय मानव अधिकार रक्षक सञ्जालको छलफल कार्यक्रम धनगढीमा सम्पन्न
कैलाली खबर डटकम । २०८२ कात्तिक १५ गते
धनगढी । कैलालीको धनगढीमा सुदूरपश्चिम प्रदेश स्तरीय मानव अधिकार रक्षक सञ्जालको छलफल कार्यक्रम सम्पन्न भएको छ । अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय, धनगढीको आयोजनामा प्रदेश स्तरीय मानव अधिकार रक्षक सञ्जालको छलफल कार्यक्रम बिहीबार सम्पन्न भएको हो ।
इन्सेक सुदूरपश्चिम प्रदेश संयोजक खडकराज जोशीले जेनजी आन्दोलनको कारण सृजना भएको देशमा उत्पन्न विषम परिस्थितिमा मानव अधिकार रक्षकहरूलाई काम गर्ने कार्यक्षेत्रमा विभिन्न समस्या र चुनौतीको सामना गर्नु परेको अवस्थामा सबै मानव अधिकार रक्षकहरूको सुरक्षा, संरक्षण र प्रवर्द्धनका लागि मानव अधिकार रक्षकहरू बिच समन्वय हुन आवश्यक रहेको बताउनु भयो ।
उहाँले सङ्घसंस्था प्रतिको नकारात्मक दृष्टिकोणलाई परिवर्तन गर्न जेनजीहरुको धारणा सम्बोधन हुने गरी बहस तथा छलफलको माध्यमबाट सहयोग गर्न सकिने र सरोकारवालाहरू सँग समन्वय बढाउन नियमित भेटघाट र छलफल गर्नु पर्ने संयोजक जोशीले बताउनु भयो ।
फाया नेपालकी अध्यक्ष गोमा आचार्यले मानव अधिकार उलङ्घनका घटनामा वृद्धि भएकाले राष्ट्रिय मानव अधिकार आयोगको अगुवाइमा प्रहरी र प्रशासनसँग छलफल गर्नु पर्ने र मानव अधिकार रक्षकहरूले राजनीतिक दलसँग आबद्ध भएका युवा र जेनजीहरु सँग छलफल गर्नु पर्ने बताउनु भयो ।
मानव अधिकार रक्षक सञ्जालको संयोजक तथा गैरसरकारी सङ्घसंस्थाको सुदूर पश्चिम प्रदेशको अध्यक्ष देवीप्रसाद खनालले मानव अधिकार रक्षकहरूले जनताको अधिकारका लागि वाचडकको रुपमा काम गर्दै आइरहेको भएता पनि विभिन्न आरोप प्रत्यारोप लाग्ने गरेकाले अरूको अधिकार हनन नहुने गरी काम गर्नु पर्ने र सूचनाको आदान प्रदानको साथै समस्यालाई साझा गर्नु पर्ने बताउनु भयो ।