नेपाल मानव अधिकार वर्ष पुस्तक–२०२३ प्रकाशन पूर्व वार्षिक समीक्षा सम्पन्न

सिन्धुपाल्चोक । २०७९ पुस १३ गते

नेपाल मानव अधिकार वर्ष पुस्तक २०२३ का लागि पूर्व समीक्षा कार्यक्रम ०७९ पुस १२ गते चौतारामा सम्पन्न भयो । सन् २०२२ मा सिन्धुपाल्चोक जिल्लामा सङ्कलन गरिएका मानव अधिकार उल्लङ्घनक ४० ओटा घटना समावेश गरिएको प्रतिवेदन इन्सेक जिल्ला प्रतिनिधि नातिबावु धितालले सरोकारवाला बीच प्रस्तुत गरेका गर्नु भएको थियो । जिल्लामा यस वर्ष इन्सेकले अभिलेख गरेको मानव अधिकार उल्लङ्घनका ४० ओटा घटना मध्ये व्यक्तिगत हत्याका ६, बालअधिकारका १२, महिला अधिकारका १८, कुटपिटका दुई, हिरासतमा यातनाको एक, संरचना ध्वस्त एक र कारागारमा मृत्यु एक रहेका छन्  । समीक्षा कार्यक्रममा बोल्दै राष्ट्रिय अनुसन्धानकी इन्स्पेक्टर नविना प्रजापतिले सुरक्षाकर्मीले सँधै मानव अधिकारको संरक्षणमा खटिनुपर्ने धारणा राख्नुभयो ।

  

जिल्ला प्रहरी कार्यालयका इन्स्पेक्टर हरिबोल के.सी.ले सुरक्षाकर्मीको प्रमुख भूमिका नागरिकहरूको मानव अधिकार संरक्षण गर्नु भएको धारणा राख्नुभयो  । जिल्ला प्रशासन कार्यालयका प्रशासकीय अधिकृत सुरेश थापाले मानव अधिकार हननका घटना  सङ्कलनको अलावा इन्सेकले मानव अधिकारसम्बन्धी सचेतना  कार्यक्रम पनि सञ्चालन गर्नुपर्ने सुझाव दिनुभयो । नेपाल बारका जिल्ला अध्यक्ष भूपेन्द्र थिङले जेष्ठ नागरिकका अधिकार र बाल अधिकारमा इन्सेकले विशेष महत्व दिनु पर्ने बताउनु भयो । कार्यक्रममा नेपाल पत्रकार महासङ्घका सचिव बिदुर आचार्य, महिला मानव अधिकारकर्मी हरिकला भट्ट लगायतले घटनामा आधारित भएर आआफ्नो धारणा राख्नु भएको थियो ।

इन्सेक बागमती प्रदेश कार्यालय, हेटौँडा